कहाँ छ सरकार, कुमारित्वझैँ बुढ्यौली लिलामी हुने ?

पुसको विहानको चिसो । काठमाडौंको भिड । त्यो भिड र पुसको तुवालो पन्छाउँदै एकाविहानै बागबजारस्थित होटल हार्दिमा पुग्दा एक जथ्था साहित्यकार उपस्थित भैसकेका थिए । बाटैमा गजलकार बाबु त्रिपाठी भेटिन्छन । म भने भन्दा आधा घण्टा ढिला भैसकेकी हुन्छु । नाटककार पुरु लम्साल तिमीनै ढिला आएर हुन्छ भन्दै थिए तर, कार्यक्रम सुरु हुने अझै छाटकाट थिएन ।

छोटो भलाकुसारी पछि कार्यक्रम हलमा छिर्दै गर्दा नाटककार तथा गजलकार पुरु लम्साल पोडियमको माईक समाउन पुग्छन । सुरुमै कार्यक्रम ढिलो सुरु भएकोमा क्षमा याचना गर्छन र कार्यक्रम सुरु  गर्छन । यो दृष्य हो आईतबार राजधानीमा आयोजित कवि कमल शाहको कविता संग्रह ‘बुर्जुवा मस्तिष्क’ समारोहको ।

किशोरवयमा झुल्किँदै गर्दा

तपाईको आर्दशको रोता झण्डा

दर्शनका मोटा मोटा ठेली

र क्रान्तिकारी मादल बोकेर

स्कुलका कक्षाहरु भत्काउँदै

म तपाईको पिछा लागेथेँ

ब्यागपाईपरको पछि मुसा लागेझैँ

 पुरु लम्साल कविताका यस्तै हरफ फलाक्दै र कार्यक्रमको औपचारिकता निभाउँछन् । कार्यक्रममा उपस्थित स्रष्टालाई स्वागत गर्न  गजलकार बाबु त्रिपाठी मञ्चमा पुग्छन । अरुबेला बोलेर नथाक्ने त्रिपाठी यो कार्यक्रममा भने कमै बोल्छन र स्वागतका शब्द बोलेर बिदा माग्छन् । कवि कमल शाहको कविता संग्रह ‘बुर्जुवा मस्तिष्क’ कार्यक्रमका प्रमुख आतिथि प्राज्ञ कवि अमर गिरीले विमोचन गर्छन । गिरीलाई कवि प्रोल्लास सिन्धुलीय, प्राज्ञ कवि वियोगी बुढाथोकी लगायतका स्रष्टाले साथ दिन्छन ।

विमोचनको औपचारिक कार्यक्रम सकिए पछि कविता वाचनका लागि मञ्चमा पुगेका कवि शाह आफूले कविता लेख्नका लागि र प्रकाशनका लागि नलेखेको केवल आत्मा सन्तुष्टिका लागि लेखेको बताउँछन । एउटा मान्छेले आफ्नो आत्मालाई सन्तुष्ट बनाउने पाटो सायद अरु मान्छेको पनि सन्तुष्टिको पाटो बन्दो ररहेछ । त्यसैले कवि बन्नकै लागि भनेर कविता नलेखेका शाहलाई उनका कविताले कवि बनाए र उभ्याए अन्य कविहरुका पङ्तीमा ।

तिमी त्यति सुन्दर छैनौं

जति आमा हुनुहुन्छ

तिमीमा त्यति गाम्भीर्य छैन

जति आमामा छ

किनकी तिमी आमा भएकी छैनौ

आमा नहुन्जेल

तिमी आमाजति सुन्दर हुनेछैनौ ।

कवि शाहले मञ्चमा उभिएर यी कविता हरफमा आवाज भरीरहदा उनलाई समयले अझै अग्लो उचाईको कवि बनाउँछ भन्नेहरुपनि त्यहि पङ्तिमा थिए । २०५५ सालबाट साहित्य लेखनमा लागेका कवि शाहको यो पहिलो कविता संग्रह हो । ग्रामिण विकास विषयमा स्नातकोत्तर गरेका शाह कैलालीमा बस्छन र कविता सिर्जना गर्छन । तर, उनका कवितामा कैलाली हाबि भएको छैनन् ।

कार्यक्रममा कवि शाहको कविता संग्रह ‘बुर्जुवा मस्तिष्क’ भित्रका कवितामा कवि हेम प्रभाष, हरिमाया भेटवाल, राजिन पनेरु तथा कवि स्वयमले वाचन गरेका थिए । ‘बुर्जुवा मस्तिष्क’ भित्रका कविता माथि कवि आर एम डंगोलले टिप्पणी गरेका थिए । मधुवन साहित्यिक प्रतिष्ठान नेपाल, साहित्य परिवार नेपाल मेडिकल कलेज प्रा.लि. र शब्दघर छापाखाना, बागबजारले सयुक्त रुपमा विमोचन गरेको यो कविता संग्रह सुरेन्द्रकुमार शाहले प्रकाशन गरेका हुन ।

कहाँ छ सरकार

कुमारित्वझैँ बुढ्यौली लिलामी हुने ?

टाँसिदिनुस तपाईको सुचनापाटीमा

बेच्दै छिन रे बुढ्यौली

कुनै समय

कुमारित्व सबभन्दा बढीमा लिलामी गर्ने

सगुनीदेवी उर्फ रम्भा !

-nepalpati